Protestat kundër shembjes së godinës së Teatrit Kombëtar kanë vijuar edhe ditën e sotme. Aktorët dhe qytetarët janë kundër shembjes së godinës së Teatrit Kombëtar. Sot, në protestë ka marrë pjesë dhe deputetja e PD-së, Jorida Tabaku.
Demokratja mbajti një fjalim para të pranishmeve, vetëm pasi firmosi peticionin që është kundër shembjes së godinës.
Tabaku nuk është kursyer aspak me akuzat e saj në drejtim të qeverisë dhe të bashkisë, ndërsa u shpreh se po grabitet prona publike dhe qyteti po shitet.
“A e shembëm stadiumin. Sot nuk është as stadiumi. Qyteti pak nga pak po shitet dhe po falet. Unë kam reaguar në datën 8 qershor kur doli për herë të parë ligji. Parlamenti nuk është zyrë koncesionesh. Kjo është marrëveshja me madhe që po bëhet. Kryetari i bashkisë e di që prona nuk mund të transformohet dhe këtë ligj e kanë sjellë në parlament.
Prona publike po falet. Ka ardhur koha që ne t’i themi ndal rrënimit të qytetit. T’i themi ndal grabitjes. Që na nesër fillon lufta në Komisionet parlamentare sepse këtu po flasim për vjedhje dhe grabitje. Nuk flasim për ndërtimin e një ndërtese të bukur. Flasim për prishjen e të vetmes ndërtesë që ka mbetur”- tha Tabaku.
