Dhjetra persona janë arrestuar nga autoritetet policore në Kubë, pas protestave masive që kanë përfshirë vendin, ndër më të mëdhatë kundër diktaturës, bëjnë me dije burimet e medias dhe atyre të opozitës.
Sipas pamjeve të publikuara, kryesisht në rrjetet sociale, shihet se si forcat policore ushtrojnë dhunë ndaj protestuesve, teksa disa prej tyre i spërkasin edhe me gaz lotsjellës, shkruan BBC.
Presidenti i Kubës Miguel Díaz-Canel, i cilësoi protestuesit si mercenarë gjatë një fjalimi të tij, ndërsa Ministri i Jashtëm, deklaroi se pas demonstratave qëndrojnë Shtetet e Bashkuara të Amerikës, teksa i akuzoi oër financimin e tyre.
Megjithatë, protestuesit të cilët mbushën rrugët e vendit, deklaruan se arsyeja e protestës së tyre, ka të bëjë me kolapsin e ekonomisë, dhe situatës së shkaktuar për shkak të pandemisë së koronavirusit.
Përgjigja e qeverisë ndaj demonstratave ishte e shpejtë. Shifrat e përpiluara nga qendra e ndihmës ligjore Cubalex tregojnë se rreth 100 njerëz u arrestuan vetëm të dielën e 11 korrikut.
Midis të arrestuarve është gazetarja Camila Acosta e cila po mbulonte protestat për gazetën spanjolle ABC. Ministri i Jashtëm spanjoll José Manuel Albares kërkoi lirimin e saj të menjëhershëm.
