Pas paralajmërimit të Policisë së Shtetit se do të ndërhyhet për të gjithë ata që do të bllokojnë nesër rrugët, ka reaguar Partia Demokratike.
Kjo e fundit, e ka cilësuar deklaratën e Altin Qatos, si një kërcënim ndaj qytetarëve të lirë të vendit, në një përpjekje për të ndaluar popullin.
Gjithashtu, në deklaratë PD-ja i bën thirrje policisë që të mos dalë kundër popullit për interesat e Edi Ramës, si dhe shtoi se do të filmohet çdo punonjës i policisë që tenton të pengojë qytetarët.
“Partia Demokratike dhe Opozita e Bashkuar, i bëjnë të qartë sot kupolës së policisë të heqin dorë nga keqpërdorimi politik dhe të mos pranojnë të dalin kundër popullit për interesat e Edi Ramës.
Partia Demokratike dhe Opozita e Bashkuar i bën të ditur publikisht çdo punonjësi dhe funksionari të policisë, se do të filmohet e do të regjistrohet emër për emër kushdo që tenton të pengojë apo intimidojë qoftë dhe një qytetar të vetëm.
Do të mbajnë përgjegjësi penale para ligjit, dhe nesër do të përgjigjet deri më një, çdo drejtues, shef apo punonjës policie që do tentojë të cenojë të drejtën sovrane të qytetarëve për të protestuar paqësisht.
Protesta nesër do të jetë paqësore, por e vendosur dhe e pathyeshme”, shkruhet ndër të tjera në këtë deklaratë.
