Aktivisti i lëvizjës ‘Për Universitetin’, Enriko Peçulaj, student i Filozofisë në vitin e tretë ka treguar për gazetën Koha Ditore në Kosovë gjithë ecurinë e protestës së studentëve në Shqipëri.
Gjithçka sipas tij filloi pas një vendimi që i detyronte studentët të paguajnë rreth 5 euro për secilin provim që i nënshtrohen. Por revolta, tregon ai, kishte nisur qysh para 5 vitesh, për Ligjin për Arsimin e Lartë, që ai e quan “kryekëput klientelist”.
“Studenti kthehet në klient i cili e mban gjallë biznesin universitar me para, dhe jo më subjekti qendror dhe revolucionar brenda universitetit që synon të transformojë shoqërinë dhe sigurisht, veten”, tregon ai.
Tani që protesta është pezulluar përkohësisht, Peçulaj thotë se nuk janë të gatshëm të heqin dorë nga asnjëra prej tetë kërkesave të tyre, duke shtuar se do vijojnë të refuzojnë thirrjen e kryeministrit Rama për dialog. “Ne besojmë se dinjiteti ynë është i panegociueshëm”, thotë ai.
Peçulaj që është prej 3 vitesh aktivist në këtë Lëvizje, e cila ka vetëm strukturë horizontale, pa hierarki, tregon se si do të vazhdojë protesta e studentëve. Ai thotë se qëllimi i kësaj proteste nuk ka qenë rrëzimi i Qeverisë apo ndryshimi në skenën politike. Por ai megjithatë beson se themelet e pushtetit po shkunden dhe ndryshime rrënjësore në mbarë shoqërinë kanë për t’i pasuar këto protesta.
“Qëllimi i kësaj proteste, nuk ka qenë rrëzimi i kësaj Qeverie apo ndikimi i drejtpërdrejt në ndryshimin e skenës politike. Ashtu si e theksova më lart, aktorët politikë që po na qeverisin këtu e 28 vjet më parë, janë shkaktarë të kalbëzimit të Universitetit në veçanti, dhe të shoqërisë në përgjithësi. Edhe pse studentët nuk dolën në shesh për të rrëzuar Qeverinë, të gjithë e dimë shumë mirë se themelet e pushtetit po shkunden dhe ndryshime rrënjësore në mbarë shoqërinë kanë për t’i pasuar këto protesta”, perfundon ai.
