Prokurorja speciale Katica Janeva e cilëson qeverisjen dhjetëvjeçare të VMRO DPMNE-së si burim të veprimeve kriminale dhe shantazheve, dhe shpreson se ish-kryeministri Nikolla Gruevski do të dalë para gjykatës për veprimet që dyshohet, raporton “Shenja.”
“Vlerat morale në shoqërinë e Maqedonisë gjatë dhjetë viteve të fundit janë zhvendosur, gjithë kjo për shkak të qeverisjes së kësaj garniture qeveritare. Këtë e pamë nga materialet e publikuara, dhe ne e dëgjojmë nga materialet e bisedave telefonike që nuk janë publikuar. Më e rëndësishmja deri tani është keqpërdorimi i procesit zgjedhor ku partia qeverisëse për shkaqe lukrative, partia qeverisës ka qëndruar në pushtet. Me veprime kriminale, shantazhe dhe vepra të tjera kriminale i kanë shantazhuar finansierët, firmat në Maqedoni në mënyrë që të fitojnë para të cilat u duheshin për të qëndruar në pushtet. Ne doemos duhet t’i parashtrojmë akuzat tona por megjithatë vendimi për dënim ose lirim i mbetet gjykatës. Ne jemi vetëm prokuror. Puna jonë e vetme është që të mbledhim prova për veprime të caktuara kriminale të personave të caktuar. Duhet theksuar se misioni jonë është se të gjithë janë të barabartë para ligjeve në Maqedoni”, tha Prokurorja Speciale Katica Janeva
Ndaj ish-kryeministrit Nikolla Gruevski ka pasur shumë akuza nga partitë opozitare. Ai është akuzuar për skandalin e përgjimeve, për nxitje të konflikteve etnike, për shantazh dhe thirrje për luftë. Deri tani akoma nuk ka pasur një proces gjyqësor që të përball Gruevskin me akuzat ndaj tij.
