Prokuroria ka dërguar për gjykim Artan Laçin, i cili mashtroi disa persona duke u prezantuar si nëndrejtori i ALUIZNI-t.
Laçi ka mashtruar tre persona, të cilëve u ka marrë para në formë ryshfeti për t’u nxjerrë lejet e legalizimit.
I riu nga Kavaja është denoncuar nga një grua, së cilës i ka vjedhur 5.8 milionë lekë të rinj, duke e mashtruar për legalizimin e një prone.
Ai i ishte afruar vetë për ta pyetur se çfarë problemi kishte, duke i ofruar ndihmë, pasi sipas tij ishte zv.drejtor dhe mund t’ia nxirrte shpejt lejen e legalizimit, pa e zvarritur për plotësimin e dosjes së nevojshme.
Gruaja ka pranuar dhe ka komunikuar vazhdimisht me të në telefon dhe me mesazhe, duke i dhënë para sa herë që ai i kërkonte.
Pas kallëzimit nga shtetasja Sh.M, Policia e Tiranës ka nisur hetimet nëse ka persona të tjerë që mund të jenë mashtruar nga 23-vjeçari. Ky i fundit nuk ka pranuar të flasë.
