Në takimin e zhvilluar sot për diskutimin e projektit të gazsjellësit Jonian-Adriatik ishin të pranishëm edhe ambasadorët Vlahutin dhe Lu, të cilët shprehën mbështetjen e tyre për gazifikimin nga ana e SHBA-ve dhe BE-së.
Gjatë fjalës së tyre, të dy ambasadorët thanë se ky gazsjellës ka një rëndësi të madhe për Shqipërinë, pasi hap vende të reja pune duke u bërë një treg i rëndësishëm i energjisë në Evropë.
“Gazjellësi jonian ka një rëndësi të madhe për zhvillimin dhe fuqizimin vendit. Jemi shumë afër realizimit të kësaj ëndrre për të fuqizuar vendet ku kalon ky gazsjellës. SHBA-të kanë treguar mbështetjen e tyre për gazsjellësin që do të kalojë në Shqipëri, Bosnje dhe Hercegovina, duke ulur çmimin e energjisë. Shqipëria ka të gjithë mbështetjen dhe ndihmën tonë për implementimin e gazsjellësit.
Për Shqipërinë gazsjellësi Jonian-Adriatik do të thotë më shumë investime, Shqipëria do të ketë më shumë se dhjetëra miliona dollarë fitime dhe do të bëhet një treg i rëndësishëm i energjisë në Evropë.
Besoj se ky gazsjellës do krijojë atë bashkëpunim që i ka munguar rajonit të Ballkanit”, tha ambasadori amerikan Donald Lu.
Ndërkohë, Vlahutin theksoi se projekti është një hap më shumë drejt integrimit në BE për shkak të standardeve evropiane dhe përfitimet që do të sjellë.
“Nëpërmjet këtij projekti kërkojmë të krijojmë një linjë të sigurt energjie që do ta kthejë gazsjellësin në një treg të rëndësishëm. Gazsjellësi Jonian-Adriatik do krijojë akses të vazhdueshëm për shtetet e përfshirë në këtë projekt. Gazifikimi është shumë i rëndësishëm. Dua të theksoj se do të përmirësohet tregu i energjisë, është një përfitim shumë i madh edhe për brezat e ardhshëm në shumë mënyra.
Dua të theksoj se gazifikimi është një hap më shumë për integrimin në BE për shkak të standardeve evropiane si dhe për përfitimet që do të sjellë.
Do t’ju siguroj se BE do të qëndrojë krah jush për të bashkëpunuar dhe për të implementuar në tërësi të gjithë projektin”, tha Vlahutin./Tirana Today
