Kampionati shqiptar i futbollit pas çdo jave po degradohet më shumë me vendime të gabuara arbitrash dhe akuza të ekipeve se po dënohen padrejtësisht. FSHF ndërkohë nuk ka marrë asnjë masë për të qetësuar situatën, por vazhdon punën e saj nën sulme të vazhdueshme nga ekipe dhe legjenda të futbollit se po prish garën duke caktuar se kush do të fitojë kampionatin e kush do të bjerë nga kategoria.
Profesor Përparim Kabo në emisionin “Procesi Sportiv” ka bërë një deklaratë të fortë, teksa fillimisht iu drejtua presidentit të gjyqtarëve të futbollit në Shqipëri, Tahir Kastratit duke e pyetur për largimin e Lorenc Jeminit nga futbolli.
Ndërkohë, profesor Kabo iu drejtua edhe Armand Dukës. “Kush e hoqi Lorenc Jeminin nga gjykimi? Jep përgjigje, kush i dha urdhër Lorenc Jeminit që të nxirrte barazim ndeshjen Partizani-Luftëtari sezonin e shkuar dhe kur fitoi Partizani 2-0, e hoqën!
Kam një mesazh edhe për Armand Dukën. Titaniku mbytet kur je duke pirë shampanjë dhe nuk e sheh ajsbergun. Ti po e mbyt FSHF dhe shumë shpejt do ikësh, pasi do të thirresh nga organet kompetente”, tha profesor Përparim Kabo.
