Problemet e bizneseve të vogla në Greqi kanë bërë bashkë drejtuesit e shoqatave të biznesit dhe drejtuesit politikë në Athinë. Gjatë një fjalimi për vështirësitë që hasin bizneset e vogla, kryeministri Aleksis Tsipras kërkoi të nënvizonte simbolikën më të gjerë të një dege ulliri, të cilën e mori dhuratë nga presidenti i Konfederatës Helene të Profesionistëve, Zejtarëve dhe Tregtarëve (GSEVEE), Giorgos Kavvathas .
Kavvathas theksoi rëndësinë e bashkëpunimit mes bizneseve si një mënyrë e vetme për të dalë nga kriza. Kjo sipas tij, do të jetë një ndihmë e madhe për gjeneratat e ardhshme.
Tsipras kërkoi të dërgonte një mesazh drejt Turqisë, në një kohë shqetësuese për fatin e dy ushtarëve grekë që u arrestuan nga autoritetet turke pasi kaluan gabimisht kufirin.
“Le të shpresojmë që kjo degë ulliri të ketë një simbolikë më të gjerë në këto ditë vendimtare. Le të simbolizojë paqen, koordinimin dhe bashkëpunimin si për sa i përket forcave shoqërore në nivel të brendshëm, por edhe të gjitha partive që përbëjnë pjesën e brishtë në Evropën Juglindore”- tha ai, duke iu drejtuar në mënyrë të qartë Turqisë për një normalizim të marrëdhënieve.
Ndërkohë arrestimi i ushtarëve ka shkaktuar tensione të reja, pasi grekët në shenjë proteste kanë djegur flamurin e Turqisë. Autoritetet turke kanë bërë thirrje se “vandalistët” duhet të arrestohen dhe të dalin para drejtësisë.
Por,dega e ullirit e përdorur nga kryeministri i Greqisë, Aleksis Tsipras është një sinjal shpresë se marrëdhëniet mes dy vendeve do mund të rregullohen. TIRANA TODAY
