Peshëngritja shqiptare në kaos, KOKSH ka vendosur që të mos marrë pjesë në dy vitet e ardhshme në garat europiane për shkak të dopingut. Por këtë vendim e kanë kundërshtuar me forcë sportistët të cilët kanë rezultuar të pastër dhe kërkojnë që të mos e humbin këtë shans për të sjell të tjera medalje në Shqipëri. Në Spanjë do të organizohen Lojërat Mesdhetare dhe shtangistët, Erkand Qerimaj, Daniel Godelli dhe Briken Calja janë të ftuar në këtë garë, por nuk lejohen nga KOKSH. Ata kanë “pushtuar” zyrat e KOKSH-it, duke kërkuar vendimin e zbardhur të pezullimit. Nuk kanë munguar edhe tensionet, teksa është shkuar gati në përplasje fizike.
Një ditë më pas, sot, duket se peshëngritja ka marrë indirekt një mbështetje nga një ish-sportist i kësaj disipline, tashmë President i Republikës. Më konkretisht, kreu i shtetit, Ilir Meta, ka takuar sot fituesin e tri medaljeve të arta në Kampionatin Europian të fundit, Briken Calja, me të cilin ka pozuar dhe foton e ka shpërndarë në rrjetin social të Facebook-ut, duke shtuar edhe një status-mesazh:
“Kënaqësi të takoja sot peshëngritësin Briken Calja, fituesin e 3 medaljeve të arta në Kampionatin Evropian të Peshëngritjes, shumë të çmuara në këtë Vit të Skënderbeut. Shpresojmë të tjera medalje gjatë këtij viti, jo vetëm nga peshëngritja, por edhe nga sporte të tjera”.
