Presidenti, Bujar Nishani, ka pritur sot në një takim, Zhang Gaoli, anëtari i Komitetit të Përhershëm të Byrosë Politike të Komitetit Qendror të Partisë Komuniste të Kinës dhe Zëvendëskryeministër i Parë i Këshillit të Shtetit të Republikës Popullore të Kinës.
Kreu i Shtetit vlerësoi marrëdhëniet miqësore mes dy popujve, si dhe theksoi zgjerimin e bashkëpunimit ekonomik me shtetin kinez.
Gjithashtu, presidenti njohu zyrtarin e lartë kinez me zhvillimet në rajonin e Ballkanit, duke evidentuar progresin në drejtim të paqes dhe stabilitetit pas konflikteve të armatosura e të dhunshme, që shoqëruan shpërbërjen e ish-Jugosllavisë, si dhe zhvillimet pozitive në këtë drejtim, veçanërisht pas pavarësisë së Kosovës.
Presidenti Nishani shprehu besimin se roli i Republikës Popullore të Kinës do të shtrijë efektet e veta pozitive edhe në rajonin e Ballkanit Perëndimor, veçanërisht në pavarësinë e Kosovës.
Në fund të takimit, Nishani përcolli, përmes zotit Gaoli, përshëndetjet më të përzemërta për presidentin e Republikës Popullore të Kinës, si dhe një ftesë për të vizituar Shqipërinë në një kohë sa më të përshtatshme.
