Presidenti Nishani gjatë ceremonisë së dekorimit të “Fundjavë Ndryshe”, me titullin për merita të veçanta civile, shprehu mirënjohjen për këtë nismë.
Nishani vlerësoi kontributet e nismës së stafit të “Fundjavë Ndryshe”, si dhe u bëri thirrje të rinjve që t’i bashkohen kësaj nisme.
Fjala e Nishanit gjatë dekorimit të “Fundjavë Ndryshe”:
“Aktiviteti i sotëm ka një dimension shumë të veçantë, sepse i kushtohet nderimit të kurajës, guximit dhe iniciativës së një grupi shumë të madh njerëzish të cilët, kanë jetësuar ndoshta në mënyrë të rrallë, për të mos thënë për herë të parë, disa dimensione, të cilat jo vetëm duhen njohur, jo vetëm duhen përkrahur, por duhen përhapur në të gjitha qelizat e trupit tonë.
Ndaj, ky aktivitet i sotëm përbën një rast të veçantë për mua. Dua të falendëroj përzemërsisht ata iniciatorë të parë, që nisur ndoshta nga ndjesitë humane, por edhe individuale, por të nxitur edhe nga parimet që i kanë besuar dhe i besojnë.
Në emrin e institucionit të Presidentit, por jam i bindur në emër të gjithë shqiptarëve, ju falendëroj për këtë iniciativë që keni marrë, së pari në lidhje me humanizmin.
Në te gjithë kemi pasionet tona, dëshirat tonë, kemi egon tonë individuale. Ju e përputhët në mënyrën më të mirë të mundshme.
Së dyti dua të vlerësoj vënien në dispozicion ndaj atyre që nuk kanë.
Ju më mirë se kushdo tjetër keni treguar si mund të jetësohen keto parime.
Unë mendoj që Arbër dhe të gjithë bashkëpunëtorët tuaj, keni sjellë një model të ri, edhe një kulturë të re, edhe një platforme te re dhe një filozofi të re, e cila më shumë se kurrë po duket konkurruese.
Kjo filozofi ka të bëjë me shërbimin për qytetarët dhe shërbimin për popullin. Duket që shërbimi për popullin do triumfojë ndaj të ashtuquajturës në emër të popullit.
Kemi pasur trashëgimi të dhimbshme, por sot kemi mundësinë të tregojmë se sa e suksesshme është kjo filozofi, kjo platformë në emër të popullit, e cila nuk është më retorike te jeta juaj, por është realitet që ju e keni sjellë dhe nuk e keni ndalur, pavarësisht padrejtësisë në lidhje me prezantimin e komunikimit tuaj me shoqërinë.
Jam i ndërgjegjshëm dhe besoj se më mirë se fjala e presidentit, atë se çfarë jeni ju, çfarë keni dhënë dhe çfarë jeni ju e vlerësojnë më mirë ata që kanë përfituar nga ju. Ata ndoshta nuk janë këtu, por do ta vlerësojnë gjithmonë atë ndihmë që keni dhënë.
Dua të vlerësoj edhe parimin e asocimit. Kjo kulturë duhet të mbetet si shembull, përtej grupit tuaj, kryesisht tek të rinjtë, në botën universitare, tek gjimnazistët, por edhe tek të rinjtë kudo ku janë.
Shumica dërrmuese ende nuk e ka humbur besimin tek parimet e vlerave. Ju jeni dëshmitarë se si shumë njerëz e kanë ende këtë shpresë. Sot më shumë se kurrë Shqipëria ka nevojë për këtë shpresë.”
