Votimi i gjuhës shqipe në Parlamentin e Maqedonisë po krijon mundësi të reja në rajon, por edhe një qasje integruese të shtetit maqedonas në strukturat euroatlantike. Votimi në formë unanime nga partitë shqiptare, por edhe nga partia e LSDM-së, e kryesuar nga Zoran Zaev, tashmë ka hapur horizonte të reja të fqinjësisë së mirë.
Nga Sllovenia, Presidenti i Republikës Ilir Meta, ka përshëndetur këtë akt historik, ndërsa e konsideron këtë veprim si një hapësirë të shtuar si për shqiptarët ashtu edhe për të ardhmen e Maqedonisë.
“Të dashur miq, sapo mbërrita në aeroportin e Ljubljanës mora lajmin e gëzueshëm se Parlamenti i Maqedonisë ka miratuar ligjin për përdorimin e gjuhës shqipe. Një akt i rëndësishëm jo vetëm për shqiptarët por edhe për të ardhmen evropiane të Maqedonisë”-shkruan Meta në Facebook.
Takimi i dy qeverive mes asaj të Shqipërisë dhe Maqedonisë me 15 dhjetor të 2017-s në Pogradec, duket sa ka qenë një takim, i cili ka shtruar bazat e sigurta për një realitet të tillë, që tashmë është zyrtare me votimin e gjuhës shqipe në parlamentin e Maqedonisë.
Shqipëria tashmë është në biseda historike edhe me fqinjin tjetër siç është Greqia, ndërsa pritet në vijimësi që këto problematika të hershme të marrin zgjidhje përfundimtare duke lehtësuar progresin e shqiptarëve drejt Bashkimit Evropian.
