Presidenti i Filipineve kërcënoi se do të urdhërojë arrestimin e filipinasve që refuzojnë vaksinimin kundër COVID-19 dhe u tha atyre të largoheshin nga vendi nëse nuk bashkëpunonin në përpjekjet për t’i dhënë fund një emergjence shëndetësore.
Presidenti Rodrigo Duterte, i njohur për shpërthimet e tij publike dhe retorikën e pacipë, tha të hënën në mbrëmje se është i mërzitur nga njerëzit që nuk pranojnë të vaksinohen mes një krize shëndetësore dhe duke ndihmuar në përhapjen e koronavirusit.
“Mos me keqkuptoni. Ka një krizë me të cilën përballet ky vend. Ekziston një emergjencë kombëtare. Nëse nuk doni të vaksinoheni, unë do t’ju arrestoj dhe do t’jua injektoj vaksinën në prapanicë”-tha Duterte.
“Nëse nuk pranoni të vaksinoheni, lini Filipinet. Shkoni në Indi ose diku në Amerikë,” tha ai, duke shtuar se do ti urdhëronte krerët e fshatrave të përpilonin një listë të banorëve rebelë.
