Presidenti i Shqipërisë, Bajram Begaj, mori pjesë në samitin Ukrainë–Evropa Juglindore në Kiev, si edhe në ceremonitë për Ditën e Shtetformimit të Ukrainës. Kreu i shtetit riafirmoi mbështetjen e Shqipërisë për sovranitetin, integritetin territorial, rimëkëmbjen dhe integrimin evropian të Ukrainës. ”Shqipëria ka qenë e qartë dhe e palëkundur në mbështetjen e saj për Ukrainën. Ne qëndrojmë në mbështetje të pavarësisë, sovranitetit dhe integritetit tuaj territorial brenda kufijve tuaj të njohur ndërkombëtarisht. Gjithashtu, mbështesim arritjen e një paqeje gjithëpërfshirëse, të drejtë dhe të qëndrueshme, që respekton Kartën e Kombeve të Bashkuara, të drejtën ndërkombëtare dhe të drejtat legjitime të popullit ukrainas”,-deklaroi Kreu i Shtetit.
Mesazhet që Presidenti përcolli në samit u fokusuan në forcimin e bashkëpunimin për sigurinë dhe qëndrueshmërinë përballë kërcënimeve të përbashkëta; në mbështetjen për rimëkëmbjen dhe rindërtimin transparent e të qëndrueshëm të Ukrainës si edhe në avancimin e perspektivës evropiane të Ukrainës dhe të rajonit tonë, duke e parë zgjerimin si një investim strategjik për paqen, stabilitetin dhe të ardhmen e përbashkët evropiane. Në prani të liderëve të Evropës Juglindore pjesëmarrës në Samitin e Kievit dhe Presidentes së Komisionit Evropian, Ursula von der Leyen, Presidenti Begaj kërkoi që mbështetja ndaj Ukrainës të shoqërohet me hapa konkretë.
“Mbështetja jonë, theksoi Presidenti Begaj, duhet të shkojë përtej deklaratave. Ajo duhet të përkthehet në bashkëpunim praktik. Kjo është arsyeja pse Samiti i sotëm ka rëndësi. Ai na lejon të forcojmë koordinimin politik, të thellojmë solidaritetin rajonal dhe të identifikojmë fusha konkrete për veprim të përbashkët”. Samiti u mbyll me një deklaratë të përbashkët ku liderët riafirmuan unitetin e vendeve të Evropës Juglindore me Ukrainën dhe vlerësuan sigurinë e saj si pjesë të sigurisë së gjithë Evropës. Gjatë ceremonive për Ditën e Shtetformimit të Ukrainës, Presidenti Begaj nderoi qëndresën e popullit ukrainas.
“Në këtë ditë solemne, le të nderojmë gjithashtu guximin e popullit ukrainas, ushtarëve, civilëve, familjeve, mjekëve, mësuesve, ekipeve të shpëtimit dhe vullnetarëve, të cilët vazhdojnë të dëshmojnë një forcë të jashtëzakonshme përballë vuajtjeve. Qëndrueshmëria e tyre është frymëzim për të gjithë ata që besojnë te liria dhe drejtësia”,-u shpreh Presidenti. Begaj gjatë qëndrimit të tij në Kiev zhvilloi edhe një takim kokë më kokë me Presidentin Volodymyr Zelensky.
Dy liderët diskutuan forcimin e bashkëpunimit dypalësh, mbështetjen për Ukrainën në rimëkëmbje, siguri dhe zhvillim ekonomik, si edhe mundësitë për marrëveshjeve të reja. Presidenti Begaj rikonfirmoi solidaritetin e plotë të Shqipërisë me Ukrainën dhe angazhimin për forcimin e marrëdhënieve mes dy vendeve.
