Prej një kohe të gjatë në Luginën e Preshevës mungojnë tekstet për shkollat shqipe. Nxënësit akoma marrin pjesërisht shënime gjatë orëve të mësimit, një praktikë e vjetruar mësimore.
Drejtori i shkollës së mesme “Sezai Surroi” në Bujanoc, Zejni Fejzullahu ka thënë se kjo problematikë vështirëson funksionimin normal të procesit mësimorë. Ai theksoi për “Radioevropa e lirë” se mësimdhënësit mundohen por se së bashku me nxënësit gjenden në forma të ndryshme për mësimin.
“Përkthimi I leksioneve nga serbishtja, anglishtja dhe në formën që secili mundet. Fatmirësisht në shkollën tonë kemi televizorë në çdo klasë dhe lehtësohet situata. Faktori numër 1 është nxënësi e pastaj vijnë librat, ne të parën e kemi ndërsa të dytën jo”, ka deklaruar Fejzullahu.
Ndërkohë që në afrim të vitit të ri arsimor, për shkollën e mesme janë siguruar vetëm 4 libra për gjuhën amtare nga viti i parë deri në të katërtin ndërsa nevojiten afro 300 libra tjerë.
