Drejtori i Emergjencave Civile, Shemsi Prençi deklaron se pas stinës së nxehtë të verës vendi mund të përballet me tërmete të shumta.
Gjatë një takimi pune në Prefekturën e Tiranës me drejtuesit e zjarrfikësve dhe pushtetit lokal, ai paralajmëroi rreziqet që mund të vijnë nga shirat e shumtë dhe lëkundjet sizmike.
“Pas një vere të nxehtë lind një problem i rrezikshëm. Së pari duhet të kemi parasysh që periudha e ripërsëritjeve të tërmeteve është me kohë dhe limite të përcaktuara. Duke llogaritur tërmetet e vitit ‘67 në periudhën e kthimit një herë në 50 vite, ne përkojmë me rrezikshmërinë e lartë të tërmeteve në Shqipëri në të dy korridoret Elbasan, Tiranë, Shkodër, Dibër, Korçë, etj. Ne duhet të jemi të kujdesshëm në raport me situatat e pritshme, pasi kanë nisur lëkundjet e para në qarkun e Elbasanit, kryesisht në Qukës”, – ka deklaruar Premçi.
Ai ka kërkuar gatishmëri të strukturave edhe për shirat që mund të prekin vendin pas muajit shtator.
