Kur formimi i ushtrisë së Kosovës është ende në kuadër të premtimeve, Beogradi ka filluar të shqetësohet. Mënjëherë pas deklaratave të krerëve të AAK-së e PDKS-së, Haradinaj e Veseli, se “hapi i parë i qeverisë së re do të jetë krijimi i Ushtrisë së Kosovës”, Kryeministri serb Aleksandër Vuçiq dhe drejtori i Zyrës për Kosovën, Marko Gjuriq, janë takuar në Beograd me kandidatët për deputetë të Listës Serbe.
Gjuriq ka thënë në takim se, vetëm Lista Serbe mund ta pengojë formimin e Ushtrisë së Kosovës, raporton zëri.info, teksa u ka bërë thirrje bashkëkombasve të tij në Kosovë, të përqendrojnë votat te “Lista” dhe të mos i shpërndajnë ato tek forcat e tjera politike serbe, të cilat i akuzoi si të shitura tek shqiptarët.
Drejtori i Zyrës për Kosovën në Qeverinë e Serbisë, ka thënë gjithashtu se vetëm Lista Serbe i përfaqëson interesat e serbëve të Kosovës, ndërsa partitë tjera, siç ka thënë ai, “të vogla të serbëve financohen direkt nga Prishtina. Liderë shqiptarë po përhiqen t’i blejnë disa përfaqësues të serbëve. Këtë e bëjnë në mënyrë që të marrin mbështetje për formimin e Ushtrisë së Kosovës dhe për ta ndryshuar Kushtetutën”
Sipas tij Lista Serbe mund të garantojë dhe të luftojë që lidhja në mes të Beogradit dhe institucioneve të Prishtinës të mos këputet .
