Një rast prekës është publikuar ditën e djeshme, që ka sensibilizuar shumë qytetarë. Bëhet fjalë për 14-vjeçaren nga Kosova, Dafinën e shtrirë në repartin e Hemato-onkologjisë në Klinikën e Pediatrisë në QKUK.
Dje, u publikua një foto nga gazeta Express, ku vajza kërkonte të kishte nja laptop që të mund të shihte seriale gjatë kohës që ndodhej në spital.
“Unë jam Dafina, 14 vjeçare, e shtrirë në repartin e Hemato-onkologjisë. Dëshira ime është një llaptop për projekte dhe të shikoj filma në klinikë sa jam në trajtim”, shkruante në letër.
E kjo dëshirë i është plotësuar menjëherë pas kontribuimit të qytetarëve, që në fakt nuk i kanë siguruar një, por pesë laptopë.
Familjarët në një deklaratë për Gazetën Shneta kanë falënderuar qytetarët dhe në të njëjtën kohë kanë kërkuar që të njoftohen se Dafinës tashmë i është plotësuar dëshira e saj.
Po ashtu nëse dikush nga qytetarët dëshiron të dhurojë ndonjë dhuratë tjetër, mund të lajmërohen për fëmijë të tjerë të shtrirë në këtë repart në Pediatri.
Blerja e laptopëve është konfirmuar edhe nga Klinika e Pediatrisë.
