Prej dy javësh janë pezulluar udhëtimet në postin e Vlorës drejt brigjeve të Italisë, për shkak të një defekti të shkaktuar në tragetin e linjës.
Sipas drejtorit të portit të Vlorës, kjo ka sjellë dëme të mëdha si në port, ashtu edhe për bizneset dhe qytetarët.
“Kjo është situatë e paprecedentë, si për qytetarët dhe për biznesin. Kjo situatë e krijuar ka sjellë dëme për Vlorën si qytet, ashtu dhe si importues detar, sepse të gjithë operatorët kanë ikur nga Vlora dhe operojnë në linja të tjera”, ka deklaruar drejtori Admir Malaj.
Gjithashtu, lidhur me rastin ka reaguar edhe kreu i Dhomës së Tregtisë në Vlorë, Arben Breshanaj. Ky i fundit ka theksuar se kjo mungesë i sjell dëme të mëdha biznesit.
“Kjo është një shenjë shumë e keqe për bizneset e qytetit tonë, por dhe më gjerë, sepse kjo është porta hyrëse e lidhjes së bizneseve dhe qytetarëve tanë. Të mblidhemi së bashku dhe të blejmë një traget tonin, sepse kështu nuk vazhdohet. Nuk është hera e parë që kjo ndodh”, ka thënë Breshanaj.
