Sekretari amerikan i shtetit, Mike Pompeo mbërriti dje në Tokio, ku u takua me udhëheqës të lartë të Japonisë. Kjo ishte ndalesa e parë e turneut të tij tre ditor në Azinë Lindore.
Pompeo zhvilloi bisedime me kryeministrin e Japonisë, Shinzo Abe dhe Ministrin e Jashtëm Taro Kono,ku diskutuan mbi përpjekjet për çarmatimin bërthmor të Koresë së Veriut.
“Ne do të ndajmë angazhimin tonë që shpresojmë të kemi nesër (të dielën) në Phenian. Kështu që ne do të kemi një pikëpamje të koordinuar dhe të unifikuar për mënyrën se si të vazhdojmë procesin, i cili do të fokusohet në gjërat që nevojiten nëse do të jemi të suksesshëm në çarmatimin bërthamor të Koresë së Veriut”, tha Pompeo.
Ky i fundit pritet që në Phenian të zhvillojë bisedime për çarmatimin bërthamor me udhëheqësin e Koresë së Veriut Kim Jong Un dhe ka në plan të ngrejë çështjen e rrëmbimit të japonezëve nga Koreja e Veriut.
Sekretari i Shtetit tha gjatë udhëtimit drejt Japonisë se qëllimi i takimit të tij me udhëheqësin e Koresë së Veriut është që “të kuptojë se çfarë po përpiqen të arrijnë palët dhe se si mund t’i arrijmë synimet për të cilat është rënë dakord” në Singapor, ku Kim Jong Un dhe Presidenti i amerikan Donald Trump mbajtën samitin e tyre historik, raporton VOA.
Ai shtoi gjithashtu se do të donte të caktonte një datë për një takim të dytë të nivelit të lartë mes Presidentit Trump dhe udhëheqësit koreanoverior Kim Jong Un.
Kryediolomati amerikan do të vizitojë edhe Korenë e Jugut dhe Kinën përpara kthimit të tij në Shtetet e Bashkuara.
