Vrasja e politikanit serb në veri të Mitrovicës, Oliver Ivanoviç ka krijuar mos besim edhe mes vetë serbëve. Ata dyshojnë se dhuna e shtuar në këtë rajon, ka lidhje me drejtuesit serbë në Serbi.
Politikani serb nga Kosova, Sllavisha Petkoviç, në një intervistë për “Tabloid” ka folur rreth vrasjes së Oliver Ivanoviçit dhe ndërhyrjes së presidentit serb Aleksandër Vuçiç.
“Që nga ardhja në pushtet e SNS-së, shumë serb në veri janë sulmuar. U janë gjuajtur bombat nëpër shtëpi, u janë djegur veturat, është rrahur dekani dhe profesorë tjerë. Dhe për fat të keq është dashtë të ndodhë vrasja e Oliver Ivanoviçit që serbët në Kosovë të thonë mjaft, dhe se më nuk do ta durojnë zullumin e SNS-së” thotë Petkoviç- transmeton televizioni publik RTK.
Sipas Petkovçit, në veri të Kosovës është instaluar një sistem kriminal, që si qëllim ka mbajtjen nën presion të serbëve që jetojnë aty. Petkoviç ka folur edhe për njeriun më kontravers në veri të Mitrovicës, Millan Radojçiçin.
“Millan Radojiçiç udhëheq me Listën Serbe, ndërsa Zoran Milojeviç Zela është drejtor i ‘Telekom Kosova’. Kjo është fotografia e regjimit të Aleksnadar Vuçiçit dhe personelit të tij, të cilët e kanë kthyer në të zezë veriun e Kosovës. Sa e di unë Policia e Kosovës dhe EULEX-i pas vrasjes së Ivanoviçit do të merren edhe me kriminelët në Veri. Dhe janë në pyetje ditët kur të tillët do të përfundojnë në vendet që i meritojnë, në burg. Përveç nëse Vuçiçi, e që mund të pritet, nuk u siguron vendstrehim në Serbinë qendrore” shton Petkoviç.
