Në Ditën Ndërkombëtare të Lirisë Fetare, Qendra e Bashkëpunimit Ndërfetar (QBNF) në Elbasan organizoi një aktivitet i cili synon të promovojë dhe të përcojë më tej vlerat e jashtëzakonshme të bashkëjetesës fetare në Shqipëri.
Kryetari i Grupit Parlamentar të Partisë Socialiste, Taulant Balla sëbashku me kryetarin e Bashkisë së Elbasanit, Qazim Sejdini, Kryetaren e Autoritetit për Informimin mbi Dokumentet e ish-Sigurimit të Shtetit, Gentiana Sula ju bashkuan zërit të QBNF për të promovuar edhe më shumë tolerancën ndër-fetare në Shqipëri. Në fjalën e tij, Balla tha se Elbasani është modeli më i qartë i një bashkëjetese fetare shekullore.
“Brenda në kalanë e Elbasanit, nëse kthehesh majtas sheh Kishën Ortodokse, nëse kthehesh djathtas shef Xhaminë, diku më tej është një sinagogë, apo edhe një Kishë Katolike. E pra, kjo është domethënia më e madhe që bashkëjetesa jonë fetare është forcuar brez pas brezi dhe detyra jonë, e të gjithëve, është ta promovojmë sa më shumë.
Nuk ka pasaportë më të mirë për Shqipërinë sesa bashkëjetesa fetare. Jemi kombi model për shumë e shumë kombe të tjera të cilat duhet të mësojnë nga ne. Edhe ne politikanët na takon të mësojmë prej jush, sepse në një ditë si kjo edhe ne duhet të reflektojmë për të qenë më shumë bashkëjetues me njëri tjetrin.
Të mos e shohim njëri tjetrin si dy palë armike, por ta shohim si bashkëpunëtorë në dobi të njerëzve, sepse në fund të fundit ne jemi aty ku jemi për t’u shërbyer atyre që na kanë votuar, jo për t’u shërbyer interesave të momentit të njërës apo tjetrës parti. Me vjen shumë keq, që ky model i bashkëjetesës ndër-fetare ende nuk është përkthyer nga ana jonë si një model i bashkëpunimit në interes të shqiptarëve”, deklaroi Balla.
