Të tjera detaje dalin në dritë nga operacioni ‘Forca e Ligjit’ që u ndërmor në Lezhë, që u konkludua me sekuestrimin e 1.4 milion eurove pasuri të ardhura nga veprimtaritë kriminale. “BalkanWeb” mëson se pjesë e kësaj pasurie, përveç Valentin Selajt, i dashuri i moderatores Viola Spiro, i cili tre muaj më parë u arrestua në Itali për trafik droge, janë edhe dy vëllezërit e tij, Parlind dhe Aleks Selaj. Këta dy të fundit po hetohen, pasi ka dyshime se janë përfshirë në aktivitete të trafikut të drogës, brenda dhe jashtë vendit.
Sipas medieve italiane, Selaj është një nga bosët e trafikut të kokainës që vinte nga Amerika Latine. Grupi në fjalë ishte i dyshuar për trafik ndërkombëtar të lëndëve narkotike dhe shfrytëzim prostitucioni, ndërsa operacioni “Forca e Ligjit”,i sekuestroi sot një pasuri prej 1.4 milion eurosh.
Mësohet se ndaj grupit u vendos sekuestro preventive për 15 pasuri të paluajtshme: 7 ambiente biznesi, me sipërfaqe rreth 1100 m2 si Hotel, Bar, Restorant; 4 ambiente banimi, me sipërfaqe rreth 1000 m2 (apartamente, vila); 4 parcela tokë arë, me sipërfaqe totale rreth 22900 m2 dhe 9 automjete luksoze, siç shihen edhe në foto.
Pasuritë rezultojnë të regjistruara në emër të shtetasve:
Parlind Selaj, 40 vjeç, banues në Shëngjin, Lezhë;
Valentin Selaj, banues në Rrilë, Lezhë, i arrestuar nga policia e Firences në Itali, si drejtues i një grupi kriminal që merrej me trafikimin e lëndëve narkotike nga Amerika në Itali dhe shfrytëzimin për prostitucioni;
Aleks Selaj, 35 vjeç, banues në Shëngjin, Lezhë, i arrestuar në vitin 2008 nga policia e Trentos në Itali si pjesëtar i një grupi kriminal që merrej me trafikimin e lëndëve narkotike nga Hollanda drejt Italisë, në kuadër të operacionit “Apuleio” dhe në vitin 2010 u dënua me 4.6 vite burg.
