Policia e Kosovës ka rrethuar mëngjesin e sotëm shtëpinë e Albin Kurtit te Parku i Qytetit.
Rrethimi vjen pas lëshimit të fletë-arrestit nga Gjykata Themelore e Prishtinës, për hedhjen e gazit në Kuvendin e Kosovës. Veç Kurtit, pritet që të paraqiten në gjykatë edhe Albulena Haxhiu, Donika Kadaj – Bujupi dhe Faton Topalli.
Seanca e fundit ishte planifikuar më 10 tetor, por u shty në mungesë të Albin Kurtit dhe Donika Kadaj-Bujupit. Këta të fundit munguan edhe në seancën e 13 shtatorit, ndërsa atë ditë gjyqtari Beqir Kalludra lëshoi urdhëresë për sjellje me detyrim të tyre në gjykatë.
Në seancën e kaluar kishte munguar edhe deputetja-dëshmitare Flora Brovina, për të cilën gjithashtu ishte lëshuar urdhëresë për sjellje me detyrim.
Sipas Prokurorisë, se Deliu, Brovina e Haxhiu, kanë pësuar lëndime të lehta nga gazi lotsjellës në Kuvend nga kolegët e Vetëvendosjes, të cilët akuzohen për përdorim të mjeteve të rrezikshme dhe pengim të personit zyrtar në kryerje të detyrës zyrtare.
Deputetët e kanë cilësuar këtë akuzë si politike.
Albin Kurti ka munguar edhe në seanca të tjera të këtij gjykimi, ndërsa gjyqtari Beqir Kalludra ndaj tij ka lëshuar fletarrestim, të cilin e kishte pezulluar në kohën e zgjedhjeve të përgjithshme për shkak se Kurti ishte kandidat për kryeministër të Vetëvendosjes.
Ndërkohë, deputetja tjetër e VV-së, Albulena Haxhiu që duhet të paraqitet për të njëjtin rast, është në banesën e saj. Ajo konfirmoi për Periskopin se nuk e ka ndërmend të paraqitet në gjyaktë, pasi thotë se është paraqitur disa herë për këtë rast.
Haxhiu tha se nuk do të shkojë më në këtë gjykatë për shkak se këtë rast e udhëheq i njëjti gjykatës (Beqir Kalludra), i cili ka dënuar katër aktivistët e VV-së për sulmin ndaj Kuvendi të Kosovës, dënim të cilin VV e konsideron politik.
“Unë pata shku se mendova se duhet me u ballafaqu me ta. Por më nuk do të shkojmë. Është gjykatësi i njëjtë që ka dënuar aktivistët tanë”, tha Haxhiu.
Haxhiu nuk e mohoi që mund të dërgohet me dhunë nga Policia në gjykatë, por tha se VV është mësuar tashmë me këtë gjë. Ajo tha se VV nuk do t’i nënshtrohet gjyaktësit Kalludra:
“Ne tashmë jemi mësuar me këto veprime që kanë qëllim persekutimin e VV-së. Nuk do t’i nënshtrohemi një sistemi të kapur siç është ky shtetëror. Ky sistem vepron nën urdhrat e Klanit Pronto”.
