16-vjeçari i cili përmes një video në “Tiktok”, lavdëronte vrasësin e 14-vjeçarit, Martin Cani është identifikuar nga Policia e Shtetit.
Përmes një njoftimi zyrtar blutë bëjnë me dije se pas publikimit të kësaj video specialistët e Sektorit për Hetimin e Krimeve Kibernetike në Tiranë bënë të mundur identifikimin e këtij shtetasi i cili rezulton se jeton në Shtetet e Bashkuara të Amerikës.
Materialet i janë referuar Prokurorinë panë Gjykatës së Shkallës së Parë të Juridiksionit të Përgjithshëm Tiranë, për fillimin e procedimit penal për 16-vjeçarin.
Ai akuzohet për veprën penale “Nxitja e urrejtjes ose grindjeve”, parashikuar nga neni 265 i Kodit Penal.
Ndërkohë më herët përmes një video të postuar në rrjetin social “JOQ”, ai shfaqet duke u kërkuar falje shqiptarëve dhe prindërve të 14-vjeçarit, Martin Cani.
“Kam bërë shumë gabim i kërkoj falje familjes, i kërkoj shumë familje, të gjithëve shokëve dhe shoqeve. I kërkoj falje dhe gjithë shqiptarëve më falni, më falni, më falni”, dëgjohet të thotë ai.
Njoftimi i policisë:
Në lidhje me një video të publikuar në një portal, ditën e djeshme, ju informojmë se:
Specialistët e Sektorit për Hetimin e Krimeve Kibernetike të DVP Tiranë, menjëherë pas publikimit të pamjeve filmike, kanë identifikuar shtetasin 16 vjeç që shfaqet në video, i cili banon në SHBA.
Në vijim të veprimeve për rastin, janë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për fillimin e procedimit penal, për 16-vjeçarin.
Ky shtetas, nëpërmjet rrjeteve sociale, ka bërë thirrje për nxitje të urrejtjes ose grindjeve, për mbajtje të armëve të ftohta nga fëmijët dhe për përdorimin e tyre në konflikte.
Materialet procedurale i kaluan Prokurorisë, për veprën penale “Nxitja e urrejtjes ose grindjeve”, parashikuar nga neni 265 i Kodit Penal.
