Mbrëmjen e djeshme në afërsi të Shkollës së Bashkua është plagosur nga ana e Policisë 24-vjeçari Sidion Tabaku, i cili rezulton që të jetë miku i reperit Arkimend Lushaj, i njihur ndryshe si Stresi.
Në një intervistë ekskluzive për gazetaren e “Fax News”, Stresi tha se miku i tij është plagosur vetëm pse udhëtonte pa patentë me motorrin e tij. Mirëpo policia pretendon se nuk ka qëlluar mbi Tabakun, edhe pse Fax News ka siguruar pamjet e plagosjes së tij në këmbë.
|Ka plumbin në kofshë dhe tani mund të shkoni që ta verifikoni këtë që them. Është qëlluar sepse nuk kishte patentë, e gjetëm të gjakosur dhe motorrin e shkatërruar.
Ai i shkreti ka pasur frikën e patentës që nuk e ka pasur, se dje kishte dalë për herë të parë me motor. E kanë copëtuar të shkretin, po tentojnë që të manipulojnë raportin mjekësor. Asnjë lloj manovre nuk ka bërë me motor, se na njohin të gjithë në lagje, nuk ka pasur asnjë problem me policinë. Ai mund të kishte vdek, ka qenë në gjendje të rëndë”, është shprehur Stresi.
SHÇBA pretendon se Tabaku nuk i është përgjigjur thirrjes së policisë për të ndaluar, dhe në lidhje me rastin kanë nisur hetimet.
I riu ka marrë plagë të shumta dhe në fytyrë përveç plumbit në këmbë, plagë të cilat sipas tij i janë shkaktuar për shkak të rrëzimit nga motori pas marrjes së plumbit.
