Një bombë është gjetur pranë klubit të futbollit Paris Saint Germain para se ekipi të zhvillonte ndeshjen në fundjavë.
Pesë persona janë arrestuar pasi dyshohen të jenë bashkëpunëtorë me një ekstremist islamik i cili kishte programuar një shpërthim ditën e shtunë gjatë ndeshjes.
Pajisja, e përbërë nga katër cilindra gazi të mbuluar me benzinë u gjetën në afërsi të stadiumit të “Parc des Princes”, vetëm disa orë përpara se PSG të startonte ndeshjen.
Të katër cilindrat e gazit ishin të lidhur me një “telefon celular që mund të ndezë cilindrat duke shkaktuar kështu një shpërthim”, ka treguar një burim hetues në kryeqytetin francez.
Pajisja u gjet nga një banor vendas i ndërtesës Rue Chanez i cili ka njoftuar menjëherë policinë pak para orës 4:30 të shtunën- shkruan “Daily Mail”.
Rreth 50.000 tifozë do të mbërrinin në stadium më vonë për të parë ndeshjen ndaj Brodeaux.
Ministri i Brendshëm francez, Gerard Collomb tha sot për median se i dyshuari ishte në skedarin e “FSPRT” që merret me personat që janë të radikalizuar në masën që shfaqin shenja të një “karakteri terrorist”.
Të gjithë personat e arrestuar për këtë ngjarje ndodhen në paraburgim, por asnjëri nuk është identifikuar ende zyrtarisht.
