Pas akuzave të kreut të opozitës, Lulzim Basha, se droga në Shqipëri kultivohet hapur nga drejtuesit e policisë, aq sa mund të gjesh tunele kanabisi në 30 kilometra largësi nga Tirana, Policia e Shtetit i është kundërpërgjigjur me një aksion të gjerë për gjetjen e vendeve të kultivimit të bimëve narkotike.
200 forca policore kanë ushtruar kontrolle të imtësishme nga toka dhe ajri, në zonën e Manzës dhe të Ishmit, për identifikimin dhe zbulimin e parcelave të kultivuara me kanabis, por nuk kanë mundur të gjejnë asnjë.
Kontrollet janë përqendruar në ish-magazina e depo shtetërore, ish-reparte ushtarake, tunele dhe shtëpi të braktisura, të cilat mund të përdoren për magazinim të lëndës narkotike. Kontrollet kanë vijuar nga ajri dhe toka, por pa dhënë asnjë rezultat.
‘‘Policia e Shtetit vijon kontrollin e territorit për parandalimin e kultivimit të bimëve narkotike. Paralelisht vijojnë kontrollet në territor edhe në ish-magazina e depo shtetërore, ish- reparte ushtarake, tunele, shtëpi të braktisura, sera e çdo ambient tjetër, të dyshuar se mund të përdoren për magazinim të lëndës narkotike apo për kultivim të bimëve narkotike. Në këtë kuadër gjatë ditës së sotme rreth 200 forca policore, FNSH, Drejtoria Kundër Narkotikëve, Drejtoria për Hetimin e Krimeve në bashkëpunim me Policinë Durrës kanë ushtruar kontrolle të imtësishme në territor. Kontrollet kanë vijuar nga ajri dhe toka. Kontrollet u përqëndruan në zonën e Ishmit dhe në Manëz. Nga ajri u filmuan tunele e objekte të dyshuara, ku më pas u kontrolluan nga toka nga F.N.Sh e Policia Vendore Durrës. U kontrolluan 28 tunele, 31 magazina e ish-magazina si dhe banesa të braktisura. Kontrollet po vijojnë në të gjithë territorin. Policia e Shtetit është e vendosur në luftën e pandërprerë për ta zhdukur këtë fenomen’’, thekson në njoftimin e saj Policia e Shtetit.
