Pesë policë gjermanë i kanë shpëtuar jetën një gruaje shqiptare, e cila po udhëtonte me makinë me familjen e saj, nëpër Austri drejt Gjermanisë.
70-vjeçarja kishte pasur probleme shëndetësore, ndërkohë që kishte hyrë në Gjermani.
Ajo kishte humbur ndjenjat dhe pulsi nuk i rrihte më, ndërsa shoferi ka informuar policët në postbllokun e parë policor, në pikën e kontrollit kufitar në Pocking, autostrada A3 në Gjermani.
Policët kanë thirrur menjëherë në ndihmë kolegët e tyre, të cilët kanë filluar me masat e ndihmës së shpejtë, përmes masazhit të zemrës dhe frymëmarrjes artificiale.
“Ishte një punë në ekip”, thotë eprori i tyre, 30-vjeçari Goller, i cili punon në këtë pikë nga dhjetori i vitit të kaluar.
Fakti që policët kishin mbaruar një trajnim për ndihmën e parë, i ndihmoi shumë ata që t’i shpëtonin jetën shqiptares.
Kur kjo e fundit ishte në autoambulancë, pulsi i ishte kthyer, ndërsa u dërgua për trajtim në një klinikë në Passau.
