Zvicra u eliminua nga Kupa e Botës pasi u mposht nga Suedia në ndeshjet me eliminim direkt dhe tani duket se do të ketë disa rregulla të fortë tek helvetët. Bëhet fjalë për rastin e Xhakës dhe Shaqirit dhe festën e tyre pasi i shënuan Serbisë, kjo festë duket se ka tronditur edhe kampin zviceran.
Nga deklarata e fundit e bërë nga Sekretari i Përgjithshëm i Federatës Zvicerane të Futbollit, bëhet e ditur se lojtarët me kombësi të dyfishtë duhet të zgjedhin njërën prej tyre.
“Zvicra duhet t’i bëjë pyetjen vetes nëse duhet të ndalojë shtetasit e dyfishtë që të përfaqësojnë ekipin kombëtar të futbollit. Ky incident tregon se ka një problem. Duhet të pyesim veten, a duam shtetas të dyfishtë”, tha Miescher.
“Ai sugjeroi gjithashtu se Federata mund të ofrojë programin e saj mbështetës për futbollistët e rinj, vetëm nëse ata heqin dorë nga kombësia e dytë.”
Sekretari i Përgjithshëm pranoi që Zvicra ka përfituar nga talenti i këtyre futbollistëve, por shtoi se nëse Shqipëria, Bosnja, Kroacia dhe disa vende afrikane marrin pjesë në Kupën e Botës në të ardhmen, mund të jetë rasti kur Zvicra thjesht stërvit dhe trajnon shumë lojtarë për shtetet e tjera.
Nga 12 mesfushorët dhe sulmuesit e përzgjedhur të Kombëtares aktuale të Zvicrës, 10 prej tyre kanë lindur në shtete të tjera ose kanë prindër që kanë emigruar në Zvicër. Alex Miescher u shpreh se lojtarët e rinj i premtojnë Federatës Zvicerane se nuk do të largohen, por kur arrijnë moshën 21-vjeçare zgjedhin të përfaqësojnë një shtet tjetër.
Dhe këtu ai sjell shembullin e Ivan Rakitic, i cili ka lindur dhe është rritur në Zvicër, por tani luan për Kroacinë dhe është një nga lojtarët kryesorë. Aktualisht, Federata Zvicerane e Futbollit, thotë Miescher, po mendon seriozisht idenë e përjashtimit nga Kombëtarja të lojtarëve me dy shtetësi ose të mbajnë vetëm një prej tyre.
