Tifozët e Sportingut të Lisbonës nuk janë përmbajtur dot pasi ekipi i tyre ka dështuar që të sigurojë pjesëmarrjen në Champions League në sezonin e ardhshëm. Rreth 50 tifozë ultras kanë sulmuar lojtarët dhe stafin teknik, teksa këta të fundit ishin duke kryer seancën stërvitore.
Të maskuar për të mos u njohur, ata kanë goditur me rripa e shkopinj, trajnerin Jorge Jesus dhe disa lojtarë të skuadrës. Nga ky incident ka mbetur i plagosur edhe sulmuesi holandez Bas Dost, ndërsa plagë më të lehta kanë marrë lojtarë si Acuna, Rui Patricio, William Carvalho, Misic dhe Battaglia.
Reagimi i tifozëve ka ardhur pas humbjes së Sportingut 2-1 ndaj Maritimos, në javën e fundit të kampionatit, çka ka bërë që bardhejeshilët të mbeten jashtë Champions Leagues në edicionin e ardhshëm.
