Ministri i Jashtëm serb ka deklaruar se Serbia nuk mund të tregojë planet që ka për Kosovën.
Këtë deklaratë, Ivica Daçiç e bëri në një kohë kur marrëdhëniet Kosovë-Serbi janë mjaft të tensionuara, kjo për shkak të taksës 100% të mallrave serbe.
“Nuk mund ta tregoj në detaje se cili është plani serb në dialogun mes Beogradit dhe Prishtinës, për zgjidhjen e problemit të Kosovës. Presidenti Vuçiç prezantoi parimet mbi të cilat duhet të diskutohet (me Prishtinën), por sapo erdhi ideja për publikun, në një farë mënyre u bllokua dialogu”, tha Daçic, shkruajnë mediat serbe.
Sipas ministrit, Serbia synon që të gjendet një zgjidhje kompromisi mes dy vendeve.
“Vendet që e kanë njohur Kosovën interpretojnë se Kosova ka kufijtë e saj, ndërsa qëndrimi ynë publik dhe Kushtetuta thonë se Kosova është pjesë e Serbisë. Në qoftë se ju thoni se ka dy zgjidhje kryesore, njëra se Kosova duhet të jetë e pavarur dhe tjetra se ajo duhet të ketë shkallën më të lartë të autonomisë në kuadër të Serbisë, do të shihni se asnjëra zgjidhje nuk është e pranueshme për të dyja palët”, thuhet më tej në reagimin e tij.
