Peshkatari palestinez Jihad al-Soltan është befasuar ku fare pranë plazhit të Gazës, në det hasi në një porosi në shishe.
Shishja me një pusullë në të, kishte kaluar një rrugë të gjatë prej 800 km nëpër Mesdhe duke lundruar nga plazhi i Rodos, ku u hodh në det nga një çift i ri britanik, i cili ishte atje në korrik.
“Ndodhemi aktualisht për pushim në Rodos dhe do të donim të dinim se deri ku do të arrijë kjo shishe. Ju lutem na tregoni, qoftë edhe nëse arrin në plazhin fqinj”, thuhej në pusullën e nënshkruar nga Zac dhe Beth.
Duke dashur të përgjigjet në e-mailin e adresës së specifikuar në pusullë, Soltan kishte mësuar se dërguesit e pusullës në shishe ishin studentja Bethany Ëright dhe i fejuari i saj, Zac Marriner.
Soltan është shprehur se ishte i befasuar kur ai e kuptoi se shishja kishte arritur të “depërtojë” nëpër të gjitha pengesat e Mesdheut, edhe përkundër bllokadës detare të Izraelit dhe zonës së kufizimit të peshkimit, të vendosur nga Izraeli me arsyetimin e parandalimit të kontrabandimit të armëve nga ana e Hamasit.
“Për dallim nga ne peshkatarët që nuk mund të lundrojnë më larg se gjashtë milje nga bregu, kjo shishe arriti të lundrojë nëpër ujërat ndërkombëtare dhe të kalojë shumë kufij. Shpresoj se një ditë edhe ne do të jemi kështu të lirë”, shkroi në përgjigje ai.
