Gjatë Luftës së Dytë Botërore, ndodhën disa rastësi të çuditshme, të cilat përcaktuan, ca më shumë të tjerat ndoshta më pak, edhe fatin e atij konflikti botëror. Si në frontin perëndimor ashtu edhe atë lindor, pati disa ngjarje që mund të konsiderohen si më “misteriozet”, dhe më poshtë po paraqesim 5 ngjarjet më të mahnitshme, që ndodhën në atë periudhë të rëndësishme historike.
- Varri i Tamerlanit
Në 19 qershor 1941, një grup arkeologësh rusë të udhëhequr nga Mikail M.Gerasimov hapën varrin e një gjenerali të madh mongol të quajtur Tamerlan, që kishte lidhje gjaku me Xhengis Khanin e Madh. Në varr, në mauzoleumin Gur-e Amir në Samarkand, ishte shkruar: “Cilido që do të hapë varrin tim, do të çlirojë një pushtues më të tmerrshëm se sa unë”.
Pavarësisht këtij paralajmërimi, historianët e hapën varrin. Vetëm 3 ditë më vonë, Hitleri filloi Operacioni Barbarossa për pushtimin e Bashkimin Sovjetik, që do të shkaktonte vdekjen e miliona njerëzve në Stalingrad dhe pjesën më të madhe të Frontit Perëndimor të Rusisë. Një vit më vonë, në 1942-shin, skeleti i Tamerlanit u varros sipas riteve myslimane, dhe gjermanët u tërhoqën të nesërmen.
- Dyshja vdekjeprurëse
Pas sulmit japonez në Pearl Harbor, Shtetet e Bashkuara filluan hetimet mbi praninë e spiunëve në territorin amerikan. Hetimi identifikoi një fushatë të dyshimtë reklamuese, e cila ishte shfaqur në gazetën “New Yorker” të 22 nëntor 1941, rreth 15 ditë para sulmit japonez ndaj Shteteve të Bashkuara. Në faqen e pare, shfaqej një fushatë promovuese për një lojë të re me titull “Deadly double” (dyshja vdekjeprurëse), e realizuar nga kompania “Monarch Publishing & Co”.
Reklama tregonte datën e sulmin mbi Pearl Harbor, 7/12 (7 dhjetor), dhe më poshtë shfaqeshin disa paralajmërime në tri gjuhë, duke përfshirë edhe atë gjermane. Në pjesën e pasme të revistës, pati një tjetër reklamë që tregonte një sulm ajror mbi një bunker me një stemë shumë të ngjashme me atë të Rajhut të Tretë. “Dyshja vdekjeprurëse”, dyshohej të qe një metaforë për aleancën mes Gjermanisë dhe Japonisë, por FBI-ja tha se kjo ishte një rastësi, ndonëse shumë e çuditshme.
- Fjalëkryqi i “Daily Telegraph”
Zbarkimi i aleatëve në Normandi (Operacioni Overlord), duhej të ishte një nga sekretet me të mëdha ushtarake, por duket se nuk mbeti edhe aq i fshehtë (në fakt u riquajt Operacioni Neptun, duke ngushtuar rrethin e zyrtarëve që kishin dijeni mbi të). Një muaj para nisjes së operacioneve ushtarake në 6 qershor 1944, u shfaq një fjalë e çuditshme në fjalëkryqin e revistës britanike “Daily Telegraph”.
Zgjidhjet: Utah, Omaha, Mulberry, Neptun dhe Overlord, i bënë aleatët të mendojnë se kishte patur një rrjedhje informacioni. Autori i fjalëkryqit ishte mësuesi 54-vjeçar i gjuhës angleze, Leonard Sidnej Doi, i cili pretendoi se ai nuk dinte asgjë para oficerëve të MI5-ës që nxituan ta merrnin në pyetje.
Ndërkohë pas luftës, ai deklaroi se fjalët ishin rastësore, dhe se nuk qe aspak në dijeni të operacionit të madh, duke shtuar se fjalët i hartoi pasi pa një ëndërr në të cilën i ishte shfaqur halla Elizabet, motra e babait të tij, e cila i tha 5 emra për t’i shkruar në fjalëkryq.
Edhe në vitin 1942, një fjalëkryq i “Daily Telegraph”, përmendte sulmin katastrofik ajror të aleatëve në Dieppe, që i parapriu me 2 vite operacionit fitimtar D-Day. Hetimi nuk vazhdoi më tej, por ngjarja qe vërtetë e pabesueshme.
- Njeriu “bërthamor”
T’i mbijetosh një sulmi bërthamor, është e diçka e jashtëzakonshme, por të mbijetosh dy herë rradhazi, është absolutisht një çmenduri. Tsutomu Jamaguçi është i vetmi personazh historik që mund të mburret me këtë rekord të mahnitshëm. Edhe pse zyrtarisht janë 165 viktimat e dy sulmeve nukleare amerikane, historia e tij është shumë interesante. Tsutomu, me profesion inxhinier gjendej në Hiroshima në një udhëtim pune për llogari të kompanisë ku ai punonte, Mitsubishi Heavy Industries. Ishte 6 gushti i vitit 1945, dhe avioni me mbishkrimin Enola Gay, qe duke mbërritur mbi qytetin japonez, gati për të lëshuar bombën bërthamore “Little Boy”. Jamaguçi kishte hipur në tramvaj, dhe kujton se pa dy parashuta të vogla në qiell, dhe më pas një blic verbues, i pasuar nga një shpërthim që e flaku përtokë.
Shpërthimi ndodhi rreth 3.2 kilometra nga vendi ku gjendej Jamaguçi, dhe ky i fundit arriti të mbijetojë me shumë djegie, me timpanet e veshit të shkatërruar dhe me një verbëri të përkohshme. Inxhinieri u rikthye të nesërmen në Nagasaki, dhe në 9 gusht ndodhej në ambjentet e kompanisë, kur rreth 3 kilometra larg, u lëshua bomba e dytë bërthamore “Fat Man”.
Ai pësoi lëndime më të lehta se sa nga shpërthimi i parë, duke u përplasur përtokë me disa djegie të tjera. Kjo rastësi e pabesueshme e bëri atë njeriun e vetëm në botë që i ka mbijetuar shpërthimit të dy bombave bërthamore në një distancë kaq të afërt. Jamaguçi jetoi deri në vitin 2010, ndërsa gjatë gjithë jetës bëri vazhdimisht thirrje kundër përdorimit të armëve bërthamore.
- Sulmi i “verbër” ushtarak
Në 4 qershorin e vitit 1942, Kapiteni amerikan Meklaski kreu atë që është etiketuar si një “mrekulli ushtarake”. Ai udhëhoqi një sulm “në tym” në kërkim të aeroplanmbajtëseve japoneze nën drejtimin e avionit bombardues VB3, duke gjetur dhe shkatërruar më shumë se një aeroplanmbajtëse armike plot me avionë dhe pilotë të trajnuar.
Meklaski devijoi në krahasim me kursin fillestar të planifikuar për në jugperëndim, dhe thuajse pa shumë karburant, zbuloi një kryqëzor japonez (Arashi), i cili e çoi mbi 3 aeroplanmbajtëse Kaga, Akagi dhe Soryu, të cilat nuk e prisnin një sulm ajror. Ai arriti të mos identifikohej falë fluturimit në një lartësi të madhe (6300 metra), dhe betejës që po zhvillonin në lartësi të ulët avionët amerikane me ata japonezë.
Meklaski sulmoi në pikiatë Akagi dhe Kaga-n, ndërsa Soryu u godit njëkohësisht nga avionët e tjerë mbështetës. Të tre aeroplanmbajtëset u shkatërruan pothuajse tërësisht, pjesërisht për shkak të zjarreve që shpërthyen si pasojë e karburantit që kishin avionët në pistë. Dëmi i shkaktuar flotës japoneze, përfshinte pra 3 aeroplanmbajtëset dhe të gjithë avionët që ndodheshin mbi to, duke shënuar një kthesë vendimtare në fatin e luftës së Ishujve Miduej. Përparimi japonez në Paqësor u ndal pothuajse tërësisht, dhe Lufta e Dytë Botërore shënoi hapin e parë vendimtar drejt fitores së amerikanëve.
Përshtati për Tirana Today, Alket Goce
