Përurohet skulptura “Cosmic S” e vendosur në mes të rrethrrotullimit të Zogut të Zi. “Cosmic S” është shprehje e transformimit që po pëson qyteti i Tiranës. Skulptura është punuar nga Helidon Xhixha, një nga artistët më të kërkuar në Evropë dhe Amerikë.
“Kjo vepër i kushtohet Tiranës, e cila ka qenë dhe do jetë gjithmonë një ndër shembujt për Shqipërinë. Sidomos kohëve të fundit është shembull edhe sa i përket kulturës, arkitekturës, nivelit urbanistik, sportiv, për gjithë vendin. Jam i nderuar që i dhuroj këtë monument këtij qyteti”, tha Xhixha.
Kreu i Bashkisë së Tiranës Veliaj tha:
“Është një dhuratë e dyfishtë: miqtë tanë libanezë kanë dhuruar infrastrukturën e Zogut të Zi me shatërvanët, një hapësirë e gjelbëruar që pastron ajrin në një zonë ku realisht ka trafik, ndërsa qershia mbi tortë është kryevepra e mikut tonë, Helidon Xhixha, i cili sot ka një reputacion të jashtëzakonshëm si një artist ndërkombëtar. Megjithatë, geni, rrënja dhe pasioni i shqiptarit është gjithmonë i dukshëm. Të jemi shumë mirënjohës! Ai sot është një nga artistët më të çmuar, veprat e tij kushtojnë miliona euro, por i kushtoi 3 muaj të jetës së tij krijimit të një kryevepre për Tiranën tonë”.
Kryebashkiaku theksoi se së shpejti do të fillojë puna për rrethrrotullimin te Shqiponja, ç’ka do të reduktojë trafikun që krijohet në atë zonë.
