Tirana është tronditur nga të shtënat me armë zjarri mëngjesin e sotëm. Një ngjarje e rëndë ka ndodhur në zonën e “Don Boskos” në Tiranë, ku aktualisht raportohet për një të vdekur, ndërsa një djalë po “lufton” me jetën në spital.
Një djalë raportohet të ketë qëlluar për vdekje një vajzë, e më pas ka shtënë edhe ndaj vetes. Vajza ka ndërruar jetë në vend, ndërsa agresori është transportuar për në Spitalin e Traumës, ndërsa gjendja e tij shëndetësore nuk dihet.
Sipas dëshmitarëve, bëhet fjalë për një djalë me një bluzë të kuqe, i cili ka qëlluar vajzën dhe më pas ka shtënë në ajër që të largonte njerëzit, të cilët mundoheshin për ti dhënë ndihmë vajzës.
Por duket se kjo ka qenë e pamundur, pasi ai ka kërcënuar me anë të armës. Sapo ka parë që policia ka mbërritur për të neutralizuar autorin, ky i fundit ka qëlluar veten.
Uniformat blu kanë mbërritur menjëherë në vendngjarje, e po hetojnë për rastin, motivet e të cilit ende mbeten mister.
Ngjarja rikthen në kujtesë atë të ndodhur disa muaj më parë, në një tjetër zonë të kryeqytetit, pranë Fakultetit të Mjekësisë, ku një djalë qëlloi për vdekje një studente, për shkak se refuzonte të ishte e dashura e tij.
Tirana Today, me anë të gazetarëve që ndodhen në terren, sjell pamjet nga vendi i ngjarjes.
