Gjykata e Lartë ka vendosur të rrëzojë kërkesën për sigurimin e padisë të paraqitur nga kompanitë “Vlora International Airport” dhe “2A Group”, të lidhura me biznesmenin Valon Ademi. Në këtë mënyrë i ka dhënë të drejtë sipërmarrësit Behgjet Pacolli.
Vendimi është marrë nga trupa gjykuese e Kolegjit Civil, e cila ndryshoi vendimet e mëparshme të Gjykatës së Shkallës së Parë Tiranë dhe Gjykatës së Apelit Tiranë.
Dy shkallët e para të gjyqësorit kishin pranuar më herët kërkesën për masë sigurimi padie në favor të kompanive paditëse.
Me vendimin e fundit, Gjykata e Lartë ka shfuqizuar masën e sigurimit, duke e konsideruar të pabazuar kërkesën e paraqitur nga “Vlora International Airport” dhe “2A Group”.
Kujtojmë se kjo përplasje çoi më 16 maj në bllokimin e punës në aeroportin e Vlorës, ku shoqëria A2 Group nuk lejoi hyrjen në kantierin e ndërtimit të punonjësve dhe nënkontraktorëve të Mabco.
