Në Përmet ka ndodhur një ngjarje e shëmtuar, ku ekipi i basketbollit të Flamurtarit për femra është dhunuar barbarisht nga vendasit edhe pse janë mposhtur. tre nga vajzat kanë pësuar më shumë dëmtime, Ariola Hasanaj, Sibora Malaj, Ema Mehmetaj. kulmi ka arritur në momentin kur kunati i profesoreshës së ekipit të Përmetit, i quajtur Ardian Çobo, babai i basketbollistes Irna Çobo, të ekipit “The Roses” të Përmetit ka goditur me levë në shtyllën kurrizore njërën nga vajzat.
e gjitha ka nisur pas një konflikti mes dy basketbollisteve në fushë, të cilat janë konfliktuar dhe më pas situata ka degjeneruar. katër burra janë sulur të parët ku njëri prej të cilëve ishte personi që thamë më parë, Ardian Çobo, e pas tyre stafi e të pranishmit në sallën sportive. Ato kanë mbetur të shokuara dhe rrëfejnë për gazetën “Panorama sport” dhunën që pësuan.
Ndërprerja e ndeshjes–Ndërpritet loja dhe ndëshkohen me teknikë të dy vajzat. Gjatë ndeshjes kishte përsëri acarime të lojtareve me njëra-tjetrën, e cila u pasua edhe pas mbarimit të saj.
“Disa herë është ndërprerë ndeshja, mund të themi se ajo është ndërprerë pothuajse 10 herë. Madje, trajnerja e skuadrës së Përmetit mori teknikë stoli. Pas mbarimit të ndeshjes, në fushë zbritën tifozët dhe na sulmuan së bashku me vajzat e ekipit të Përmetit. U detyruam të shkonim me vrap në dhomat e zhveshjes e aty në korridor jemi goditur.
Ne e humbëm ndeshjen, por nuk mjaftoi kjo, sepse jemi goditur barbarisht dhe jemi torturuar. Dy prej nesh që ishin në një gjendje mjaft të rëndë, as në spital nuk i dërguan, por policia, jo vetëm që nuk ndërhyri ndaj dhunuesve,por na morën të gjithave në Komisariatin e Policisë së Përmetit. Jemi shokuar nga kjo ndodhi, pasi ka qenë një barbarizëm i vërtetë. Tifozët e zyrtarët e klubit përmetar “zbarkuan” me forca të shumta në fushë për të “fshirë” fizikisht protagonistet e ndeshjes, që ishim ne vajzat e reja të Flamurtarit”,–thonë ato.
Fajtorët–“Ne fajtorë konsiderojmë trajneren e skuadrës së Përmetit, e cila u bë shkas për këtë dhunë të ushtruar ndaj nesh. Ajo shpeshherë ndërhynte dhe u bënte presion gjyqtarëve të ndeshjes. Pasi, sipas mendjes së asaj, gjyqtarët e ndeshjes shiheshin fajtorë për arbitrimin e tyre. Më pas, kur përfundoi ndeshja filloi dhuna.
Ne jemi të shokuara nga të tilla ngjarje. Jemi të frikësuara shumë, se në vend që kjo ndeshje të ishte një vitrinë për basketbollin, u kthye në një teatër të shëmtuar horror. Madje, dhe rezultati që ne kemi humbur ishte një skenar i kësaj dhune të ushtruar nga drejtuesit e klubit vendës që komprometoi një ndeshje, e cila u përjetua mes tensionit.
Në limitet e fundit të ndeshjes, kur po shkonim në dhomat e zhveshjes nuk e menduam se disa burra, familjarë dhe disa zyrtarë të klubit vendës, bashkë dhe me tifozët, të cilët mësynë fushën duke na kërcënuar, do të na godisnin me mjete të forta dhe me grushte në mënyrë barbare, aq më tepër kundrejt disa vajzave që nuk kanë mbushur ende 18 vjeç”,-deklaruan vajzat.
