Pas përmbytjeve masive, situata është përmirësuar dhe po shkon drejt normalizimit. Pak më parë, Instituti i Gjeoshkencave, Energjisë, Ujit dhe Mjedisit njoftoi se rreziku i përmbytjeve tashmë ka kaluar dhe se pritet tërheqja e lumit Vjosa.
Megjithatë, sot sërish politikanët kanë zgjedhur të shkojnë vetë në terren e të shohin gjendjen nga afër. Teksa kryeministri Rama ishte sot në Urën Vajgurore, kundërshtari i tij politik Lulzim Basha kishte zgjedhur Fierin.
Me anë të një postimi në Facebook, Basha shkruan se futja në fshatin Darëzezë ishte e pamundur, ndërsa përgëzon ushtarët që po punonin për rivendosjen e lidhjes mes zonës së përmbytur dhe pjesës tjetër të Fierit.
Jo vetëm kaq, por duket se përmbytjet kanë thyer barrierat politike. Nëse para dy ditësh kryeministri Rama u shfaq në krah të Xhelal Mziut, sot Basha ka bashkëbiseduar me kryebashkiakun socialist Armando Subashi, teksa ky i fundit e kishte njohur kryedemokratin me masat e marra për shpëtimin e njerëzve.
“Në Darzezë, në Fier, futja në fshat ishte e pamundur. Fshati i përmbytur ishte i izoluar nga shkatërrimi i rrugës. Transporti i banorëve bëhej me varka.
Përgëzova ushtarët që po punonin për rivendosjen e lidhjes mes zonës së permbytur dhe pjesës tjetër të Fierit.
Kryebashkiaku Armando Subashi më njohu me masat e marra për shpëtimin e njerëzve.
Tani që rreshjet treditore janë në minimum, është emergjente ndihma me ushqime, veshje dhe strehim për zonat e përmbytura”, shkruan Basha në Facebook.
