Kryeqyteti ngjyroset sërish i kuq, Partizani ka fituar me përmbysje derbin përballë Tiranës. Një ndeshje e gjitha për tu shijuar, me duele dhe raste të shumta. Por në fund vendos një i ri shumë premtues, sulmuesi shkodran Ruben Hebaj.
Në minutën e 51`, vjen momenti i shumëpritur për Tiranën, pikërisht nga ai që askush nuk do e kishte pritur. Grent Halili, djali i Presidentit të ekipit bardheblu, që këtë mbrëmjen e nisi si titullar, shënon golin e avantazhit për Tiranën.
Një kombinim i shkëlqyer i lojtarëve të Tiranës brenda zonës së Partizanit, bën që topi të shkojë në këmbët e Halilit, që gjendet zbuluar në krahun e djathtë duke kaluar topin sipër Alban Hoxhës. Kështu Tirana zhbllokohet dhe shënon një gol që vlen shumë, në këto momente për ekipin bardheblu. Ndërkohë në pjesën e parë Partizani pati një mundësi të shkëlqyer me Asanin, që goditi traversën duke i mohuar golin.
Para ndeshjes Halili nuk shihej si pjesë e formacionit, por duket se zgjedhja e Memës ka qenë e goditur, pasi futbollisti nuk është aktivizuar gjatë këtij sezoni. Pas golit të Halilit, vjen dhe reagimi i Partizanit, teksa në minutën e 78` është Hebaj i sapofutur në lojë.
Harkim nga e majta për sulmuesin i cili gjuan me kokë por Abibi ndal goditjen e tij. Topi mbetet aty dhe Hebaj e shtyn më pas drejt rrjetës. 1-1. Ndeshja vijon të jetë në barazim 1-1, ndërsa ritmi i saj në këto minuta të fundit është shtuar ndjeshëm, ku efekti i tifozëve shton dhe më shumë adrenalinën.
Minutat në vijim vijojnë me spektakël, është Partizani që vijon të mbetet në sulm duke tentuar golin e dytë. Sërish një tranversë mohon golin, por në minutën e 86` gafa e pafalshme e mbrojtësve të Tiranës, i jep mundësi Rubin Hebajt të futet në histori, duke shënuar golin e dytë dhe të avantazhit për skuadrën e tij. 2-1, dhe e gjithë festa është për tifozët e Partizanit që i gëzohen suksesit të radhës në derbi përballë rivalit të përjetshëm.
v
Me këtë fitore Partizani shkon në kuotën e 34 pikëve dhe duke mbajtur kryesimin, ndërsa Tirana mbetet në vendnumëro, duke u zhytur dhe më shumë moralisht por dhe në renditje, pasi mbetet në vendin e tetë me 11 pikë.
