Ministri i Infrastrukturës dhe Energjetikës, Damian Gjiknuri ka përfunduar dëshminë e tij në Prokurorinë e Krimeve të Rënda, prej nga ku ka dalë para pak minutash.
Gjiknuri u shpreh para kamerave se dëshmoi të gjithë informacionet mbi çështjen e kallëzuar nga ai për abuzimet e rrugës Tiranë-Elbasan, ndërsa shtoi se priste që hetimet të përfundojnë me sukses.
“Fola për ato gjëra që janë në audit. Nuk jam këtu për të bërë hetime, çfarë kam për të thënë i kam shprehur në audit. Në cilësinë e personit kallëzues duhej të jepja shpjegimet e mia. Pres që hetimet të përfundojnë me sukses”, tha shkurt ministri pasi doli nga Prokuroria.
Dëmi i përllogaritur nga Prokuroria për abuzimet me tenderët dhe amendimet e kontratave me kontraktorët shkon në 37 milionë dollarë. Më herët në organin e akuzës ka dëshmuar Afrim Qendro, i komanduar si Drejtor i Autoritetit të Rrugëve.
Gjiknuri u thirr nga prokurorja Elisabeta Imeraj për të dëshmuar lidhur me skandalin e abuzimit të fondeve për rrugën Tiranë-Elbasan, rast ky i kallëzuar nga vetë ministri në dhjetor.
Mësohet se Prokuroria ka thirrur ministrin e Infrastrukturës për ta pyetur nëse ka informacione të tjera që mund të ndihmojnë në zbardhjen e hetimit.
Më herët, në prokurorinë e Krimeve të Rënda kanë dëshmuar ish-ministrit e LSI-së, Edmond Haxhinasto dhe Dervishaj.
