Lajme të mira për të kuqtë në lidhje me merkatos e dimrit. Drejtuesit e Partizanit kanë arritur marrëveshjen me mesfushorin vlonjat, Bruno Telushin, i cili do të luajë për ekipin e kuq në gjysmën e dytë të sezonit.
Telushi, ish-kapiteni i Flamurtarit, është bashkuar me të kuqtë dhe ka dalë në stërvitje për të qenë gati për trajnerin Sulejman Starova për gjysmën e dytë të kampionatit. Bruno Telushi ka konfirmuar transferimin e tij tek klubi i Partizanit: “Po, është e vërtetë. Duke filluar nga janari, unë do të jem një futbollist i Partizanit. Marrëveshjen me Slaven Belupo e kam mbyllur me marrëveshje. Shkoj tek klubi i Partizanit për të përforcuar ekipin”.
Futbollisti vlonjat kaloi në Kroaci gjatë merkatos së verës, te Slaven Belupo, por së fundi nuk ka pasur hapësirat e nevojshme. Partizani bën kështu një përforcim me shumë vlera, pasi dihen aftësitë e mesfushorit potent. Një tjetër përforcim me vlera ky për ekipin kryeqytetas, pas sulmuesit Lukas Kardozo.
