Ekzekutohet në Kinë një vrasës serial, i dënuar për përdhunimin dhe vrasjen e 11 vajzave dhe grave midis viteve 1988 dhe 2002.
Gao Chengyong, i quajtur “Jack The Ripper” nga mediat kineze, vëzhgonte shtëpinë e viktimave të tij para se t’i grabiste, përdhunonte dhe më pas t’i vriste. Vrasësi u priste fytin vajzave e më pas gjymtonte trupin e tyre.
Ai ka dy fëmijë dhe u arrestua në vitin 2016 në dyqan e tij ushqimor në Baiyin, provincën Gansu. Vrasja e parë Gao e kreu në maj 1988, vitin kur lindi edhe djali i tij. Një 23-vjeçare u gjet në Baiyin me 26 plagë me thikë në trupin e saj.
Më pas ndodhën vrasje të tjera, me të njëjtën metodë. Kryesisht, vrasësi synonte gratë e reja që jetonin vetëm. Ai dëmtonte pjesët e organeve riprodhuese të viktimave të tij. Viktima më e re ishte një 8-vjeçare.
Vrasjet u ndalën në vitin 2002. Dhe vetëm disa vite më vonë u bë një zbulim i madh, kur xhaxhai i Gao u arrestua për një krim të vogël.
Ai dha një mostër të ADN-së, të cilën policia e lidhi me krimet e kryera. ADN përcaktoi se krimet ishin kryer nga një i afërm tij, që më vonë u konfirmua si Gao.
Vrasësi serial u dënua me vdekje vitin e kaluar. Gjykata në Baiyin i quajti veprimet e tij “të neveritshme”.
Ndërsa Gao u ekzekutua të enjten. Nuk është e qartë se si është kryer ekzekutimi, edhe pse dënimet me vdekje në Kinë kryhen kryesisht nga injeksioni vdekjeprurës.
