Rasti i rëndë i abuzimit seksual me një vajzë të mitur në Kavajë, e cila ka zgjatur përreth dy muaj, mori një tjetër rrjedhë gjatë ditës së djeshme. “Arrest në burg” vendosi Gjykata e Durrësit për shtatë adoleshentët nga Kavaja, të cilët akuzohen se kanë kryer marrëdhënie seksuale me një vajzë 13-vjeçare, nëpërmjet shantazhit me një video intime, që i dashuri i saj (shpallur në kërkim), kishte xhiruar gjatë kohës që kryenin marrëdhënie.
Një 15- vjeçar është ende në kërkim, si i akuzuari i tetë për abuzimin me të miturën. Ka qenë pikërisht ky i fundit strumbullari i kësaj historie, pasi ishte i dashuri i vajzës.
Ai ka xhiruar një video gjatë kohës që kryente marrëdhënie më vajzën, dhe e shantazhonte me këto pamje. 15-vjeçari i kërkonte vajzës të shkonte me shokët e tij, pasi në të kundërt ata do t’i bënin publike videon intime.
Ndodhur në këto kushte, e mitura i është bindur dhe ka deklaruar se ka shkuar me djemtë. Kjo histori ka zgjatur disa muaj, deri sa prindërit e saj zbuluan se diçka nuk shkonte te vajza, dhe i kërkuan t’u tregonte se çfarë problemi kishte. Në një moment, vajza u tregon gjithë situatën në të cilën ndodhej prej rreth dy-tre muajsh.
