Të enjten në Europa League do të zhvillohet përballja mes Marseille dhe Lazios e cila do të jetë speciale për ish-kapitenin e kombëtares, Lorik Canën. Ai ka qenë pjesë e të dy skuadrave në karrierën e tij dhe ka dhënë shumë në fushë për ta, prandaj edhe respektohet si një legjendë, më shumë në Francë.
Në një intervistë për “TuttoMercatoWeb” Cana ka kujtuar kohët e tij si futbollist te Marseja dhe Lacio. Ish-kapiteni i kombëtares sonë ruan nostalgji për Romën, por nuk mund të mungonte as edhe një koment për Strakoshën dhe Valon Berishën.
“Që kur isha fëmijë kam qenë tifoz i Marsejës pasi ata ishin një nga klubet më të forta në botë. Unë realizova një ëndërr. Edhe në Romë kam përjetuar momente të jashtëzakonshme. Gjithmonë e kam thënë se në Europë mbështes Marsejën dhe nesër ajo do të jetë skuadra për të cilën do të bëj tifoz. Në Itali për mua është vetëm Lacio.
Nuk mund ta harroj fitimin e Kupës së Italisë ndaj Romës. Për sa i përket Strakoshës ai ishte një zbulim. Është një djalë i talentuar që e do futbollit dhe është ndër më të mirët i datëlindjes 1995. Valon Berisha jep cilësi në fushë dhe mund të them se Lacio ka blerë një gladiator”, u shpreh Cana.
Gjithashtu ish-mbrojtësi është pyetur edhe për marrëdhëniet jashtë fushe. “Jam me të vërtetë me fat që kam luajtur në Romë. Dëgjohem shpesh me Taren por edhe me miq e shokë që kam në Itali. Që kur kam lënë futbollin në 2016 jam marrë me bamirësi për të promovuar futbolli në Tiranë dhe Kosovë.” përfundoi ish-kapiteni.
