Dy nga kompanitë më të mëdha në botë për pijet me sheqer tani po kërkojnë të shesin një imazh më të freskët dhe më të shëndetshëm tek publiku. Mënyra që ata kanë zgjedhur për të bërë këtë gjë, është përmes ujit të kokosit.
Pepsico po mendon të bëjë një ofertë për All Market, që ka në pronësi Vita Coco, brandin lider në ujin e kokosit.
Nëse oferta do të pranohej, Pepsi do të kalonte rivalin e saj, kompaninë Coca-Cola, e cila zotëron markën Zico, dhe do të bëhej lideri global në shitjet e produktit.
Arsyeja pse këto kompani janë kaq shumë të interesuara për t’u bërë pjesë e kësaj industrie janë dy: e para sepse imazhi i tyre prej kohësh është nën presionin e shoqërisë, si kompani që kanë lidhje të drejtpërdrejtë me obezitetin, dhe kërkojnë të ulin sheqerin në pije, si edhe të ofrojnë pije pa sheqer; dhe e dyta sepse konsumi për pije të tilla është katërfishuar 5 vitet e fundit.
Ekspertët e industrisë thonë se Vita Coco përfaqëson një të katërtën e shitjeve të ujit të kokosit në botë, një pije për të cilën kërkesa do të rritet me 20% në vit për vitet në vijim.
Uji i kokosit u bë popullor, sepse amerikanët filluan të kërkojnë alternativa të tjera të shijshme, ndaj pijeve me sheqer dhe lëngjeve.
Me pak fjalë, nëse bëhet marrëveshja Pepsico-Vita Coco, Pepsi do të vendosej në krye të një biznesi 2 miliardë dollarësh në pak vite.
Coca-Cola investoi për herë të parë në këtë industri që prej vitit 2009, ndërsa në vitin 2012 bleu shumicën e aksioneve të Zico. Sot fitimet e Coca-Cola janë shumëfishuar prej kësaj lëvizjeje dhe ka arritur të zgjerojë rrjetin duke e vendosur produktin në rrjetet kryesore të supermarketeve të vendit./scan/
