Përballja e fundit në “Elbasan Arena” mes Shqipërisë dhe Izraelit është një kujtim i keq për tifozët dhe futbollistët, pasi u mposhtëm me rezultatin 3-0. Por do të mbahet mend edhe sulmuesi i izraelitëve Eran Zahavi, i cili ishte protagonist kryesor në “shkatërrimin” e kuqezinjve. Ai shënoi gol dhe më pas provokoi portierin Etrit Berishën, ku ky i fundit u ndëshkua me karton të kuq dhe gjërat në fushë u përkeqësuar.
“Armiku” i Berishës nuk kaloi një periudhë të mirë në përfaqësuese, pasi ishte i përjashtuar për një vit. Ai kritikoi ashpër drejtuesit dhe futbollistët se nuk impenjoheshin seriozisht dhe hodhi në tokë shiritin e kapitenit. Me ardhjen e trajnerit të ri, Andreas Hercog, Zahavit i janë hapur sërish dyert në kombëtare dhe tashmë është rikthyer i penduar, pasi kërkoi falje publikisht për atë që kishte ndodhur.
“Unë kërkova falje menjëherë pas ndeshjes, por jo para të gjithëve. Gjërat nuk shkuan edhe aq mirë herën e fundit që më intervistuat”, tha ai para gazetarëve në grumbullimin e kombëtares. U thanë disa fjalë që nuk harrohen lehtë, por ne jemi këtu që të nisim një rrugëtim të ri. Erdhëm këtu që të bëjmë më të mirën për ekipin.
Nuk jam egoist, kërkoj ndjesë për atë që ndodhi. Ajo pasdite nuk mund të ishte fundi im në ekipin kombëtar. Pres një të ardhme më të mirë nga tani e tutje. Që në bisedën me menaxherin vendosëm të linim gjithçka menjëherë pas krahëve. Ajo që mësova nga kjo gjë është që herën tjetër nuk do t’ia dalë askush të më çekuilibrojë. Nuk jam më kapiteni, por nëse më japin shiritin, gjëra të tilla nuk do të përsëriten”, premtoi Zahavi para gazetarëve.
