Dëshmitarët që ndodheshin në pazarin e Milotit kur ndodhi ngjarja e rëndë, ku gruaja vrau burrin, hezitojnë të flasin nëse kishin dijeni se mes çiftit kishte pasur konflikte.
Dëshmitarët thanë se fillimisht mes tyre ka patur debat, më pas 35-vjeçarja Violeta Donaj ka nxjerrë armën dhe e ka vrarë. Një nga tregtarët i ka thënë policisë se viktima i kishte kërkuar gruas të bënte sa me shpejt 10 mijë lekë të vjetra xhiro, dhe t’ia jepte atij.
Kujtim Donaj njihej si konsumator alkooli dhe mes çiftit kishte debate te vazhdueshme. Sapo burri i ka kërkuar gruas lekë, ajo ka nxjerrë pistoletën nga çanta dhe ka qëlluar mbi të katër herë, duke e lënë të vdekur në vend. Ngjarja ka ndodhur në tregun e gjësë së gjallë në Milot, në një zonë të mbipopulluar. Çifti ka dy fëmijë dhe çdo të diel vinin tek tregu i Milotit.
