Kryeministri Edi Rama ka shpeshtuar ftesat e tij për dialog me studentët, por mënyra e përzgjedhur përmes Instagramit nuk pëlqehet nga studentët dhe stafet akademike që i mbështesin.
Për pedagogun Romeno Hanxhari, kjo nuk është seriozë dhe se çdo gjë ka një kufi, ndërsa paralajmëron se protesta do nisë sërish me 4 Janar.
“Unë mendoj se nëse qeveria nuk e kupton seriozitetin e kësaj çështje. Kur ngrihen studentët pas tyre janë familje të pakënaqura. Ajo që humbet në këto raste është qeveria. Duke humbur qeveria në këtë rrëmujë, humbasin të gjithë. Në fund të fundit, këtë qeveri kemi. Këtë kryeministër kemi që merret me Instagram. As unë nuk e di Instragramin aq mirë sa e di kryeministri.
Ka një kufi çdo gjë. Edhe sikur të mos zgjidhje deri të premten, punë e madhe, do ikin me pushime, do të fillojnë protestën prapë. Çfarë do të bëjë kryeministri që më datë 4 janar të bëjnë protestë prapë, jo 24 orë, po një orë në ditë. Ku na çon kjo gjë? Pse lojë force është kjo? Kush është më i fortë? Se e tha edhe kryeministri që ata me sulmojnë dhe unë i sulmoj! Pse kështu është kjo? Ti je kryeministri i vendit, njeriu më i pushtetshëm”, u shpreh ai në Ora News.
Protesta e studentëve vazhdon prej 13 ditësh, ndërsa kërkohet që të plotësohen tetë kërkesat e tyre për uljen e tarifave të studimit dhe përmirësimin e cilësisë së arsimit.
